कोरोनामुळे सर्वत्र भीतीचे वातावरण निर्माण झाले आहे. सर्व देश कोरोना संसर्ग रोखण्यासाठी कठोर प्रयत्न करत आहेत. कोरोना बाधितांची संख्या 19 कोटींचा टप्पा ओलांडली आहे आणि लाखो लोकांनी आपला जीव गमावला आहे.
दरम्यान, कोरोनाच्या डेल्टा प्रकाराने दहशत निर्माण केली आहे. डेल्टा व्हेरिएंट अनेक देशांमध्ये वेगाने पसरत आहेत.
संशोधनात आता धक्कादायक माहिती समोर आली आहे. कोरोनाचे डेल्टा व्हेरिएंट अत्यंत धोकादायक आहे आणि ते कांजण्या (Chickenpox) सारख्या वेगाने पसरत असल्याची माहिती आहे.
यामुळे संक्रमणाचे प्रमाण वाढले आहे. या संदर्भात, केंद्र सरकारने 10 टक्क्यांपेक्षा अधिक पॉझिटिव्हिटी दर असलेल्या जिल्ह्यांना कठोर निर्बंध लादण्याचे आवाहन केले आहे.
देशातील 46 जिल्ह्यांचा पॉझिटिव्हिटी दर 10 टक्क्यांहून अधिक आहे, तर 53 जिल्ह्यांचा पॉझिटिव्हिटी दर पाच ते 10 टक्क्यांच्या दरम्यान आहे.
केरळ, महाराष्ट्र, कर्नाटक, तामिळनाडू, ओडिशा, आसाम, मिझोराम, मेघालय, आंध्र प्रदेश आणि मणिपूरमध्ये रुग्णांची संख्या वाढत आहे किंवा पॉझिटिव्हिटीचे प्रमाण वाढत आहे.
या राज्यात अशीच कोरोना संक्रमण वाढत राहिले तर पुन्हा एकदा कठोर निर्बंध लादले जातील, तेव्हा राज्य सरकारने काळजी घ्यावी अशा सूचना केंद्राने केल्या आहेत.
केंद्रीय आरोग्य सचिव राजेश भूषण यांच्या अध्यक्षतेखाली शनिवारी (31 जुलै) बैठक झाली. या बैठकीत कोविड -19 च्या सर्वेक्षण आणि व्यवस्थापनासाठी राज्याच्या आरोग्य विभागाने केलेल्या उपाययोजनांचा आढावा घेण्यात आला.
गेल्या काही आठवड्यांत 10 टक्क्यांपेक्षा अधिक पॉझिटिव्हिटी दर असलेल्या जिल्ह्यांनी संसर्ग पसरू नये म्हणून नागरिकांच्या गर्दीवर, प्रवासावर निर्बंध लादले पाहिजेत, असे आरोग्य मंत्रालयाने एका निवेदनात म्हटले आहे.
10 टक्क्यांपेक्षा कमी पॉझिटिव्हिटी दर असलेल्या जिल्ह्यांमध्ये लसीकरण वाढवण्याची गरजही व्यक्त करण्यात आली.
केंद्राने असेही म्हटले आहे की, राज्यांनी खाजगी रुग्णालयांना पीएसए ऑक्सिजन प्लांट्स स्थापन करण्याचे निर्देश द्यावेत आणि त्यांना सहकार्य करावे.
तत्पूर्वी, जागतिक आरोग्य संघटनेने (डब्ल्यूएचओ) शुक्रवारी पुन्हा एकदा डेल्टा प्रकाराबाबत चेतावणी जारी केली.
जागतिक आरोग्य संघटनेने (डब्ल्यूएचओ) म्हटले आहे की, डेल्टा व्हेरिएंटला परिस्थिती बिघडण्यापूर्वी त्याचा प्रसार कमी करावा लागेल.
वेगाने पसरणारा डेल्टा व्हेरिएंट जो आधीच भारतात सापडला आहे. तो आता 132 देश आणि अनेक प्रदेशांमध्ये सापडला आहे, असे जागतिक आरोग्य संघटनेने म्हटले आहे.
डब्ल्यूएचओचे आपत्कालीन संचालक मायकेल रायन यांनी एका पत्रकार परिषदेत ही घोषणा केली. “डेल्टा व्हेरिएंट एक चेतावणीचा इशारा देत आहे. हा विषाणू पसरत असल्याचे लक्षण चिंताजनक आहे, मात्र ते अधिक धोकादायक होण्यापूर्वी आपण त्यावर प्रतिबंध करणे आवश्यक आहे.”
डेल्टा व्हेरिएंट अनेक देशांना हादरवून टाकत असला तरी, त्याचा प्रसार नियंत्रित करण्यासाठी अजूनही उपाय आहेत. डेल्टा व्हेरिएंटचा प्रसार रोखला जाऊ शकतो.
विशेषतः सोशल डिस्टसिंग पाळणे, मास्क घालणे, हाताची स्वच्छता याद्वारे डेल्टाचा प्रसार टाळता येऊ शकतो.
कोरोनाला रोखण्यासाठी हे उपाय अजूनही परिणामकारक आहेत, परंतु आम्हाला ते पूर्वीपेक्षा अधिक कार्यक्षम आणि अधिक प्रभावीपणे अंमलात आणण्याची गरज आहे, असे जागतिक आरोग्य संघटनेने म्हटले आहे.
हे देखील वाचा :
- राज्यातील 25 जिल्ह्यांमध्ये निर्बंध शिथिल; मात्र या जिल्ह्यांना दिलासा नाही : आरोग्यमंत्र्यांची माहिती
- तरुणांसाठी राष्ट्रवादी विद्यार्थी काँग्रेस राबवणार उद्योजक निर्माण अभियान : युवराज कांडगिरे
- मोबाईल सिमकार्डचा एक कोपरा असतो कापलेला; नेमके कारण जाणून घ्या!
