मोदी सरकार म्हणजे पाकिटमार | लोकांचे पाकीट मारणारे सरकार आहे : नवाब मलिक

मुंबई : सध्याचे मोदी सरकार लोकांचे खिसे मारणारे सरकार आहे. पेट्रोल डिझेलचे दर वाढवून मोदी सरकार लोकांचे दररोज खिसे कापत असून हे ‘पाकिटमार सरकार’ बनले आहे, असा आरोप राष्ट्रवादी काँग्रेसचे राष्ट्रीय प्रवक्ते आणि अल्पसंख्याक मंत्री नवाब मलिक (Nawab Malik) यांनी केला आहे. 

देशात निवडणुका होत्या तेव्हा भाव वाढ केली नाही, मात्र निवडणुका संपताच दिवसेंदिवस पेट्रोल, डिझेलचे (Petrol and diesel rates) दर वाढतच आहेत. काही जिल्हयात पेट्रोलचा दर शंभरावर पोचला आहे. 

जगात पेट्रोल आणि डिझेलचे दर स्थिर असताना भारतातच दर का वाढवले जात आहेत, हे मोदींनी जनतेला सांगितले पाहिजे अशी मागणीही नवाब मलिक यांनी केली.

ते सोमवारी मुंबईत प्रसारमाध्यमांशी बोलत होते. यावेळी त्यांनी मोदी सरकारवर सडकून टीका केली. कोरोनाचे संकट असताना पेट्रोल आणि डिझेलचे दर वाढवणे याचे पडसाद महागाई वाढण्यावर होत आहेत. त्यामुळे मोदी सरकारने लोकांची लूट थांबवावी. जगात पेट्रोल आणि डिझेलचे दर आहेत तेच भारतात असले पाहिजे, असेही मलिक यांनी म्हटले.

नुसत्या जाहिराती करून कोरोना संपणार नाही

कोरोना परिस्थिती लक्षात घेता एक देश एक निती हा कार्यक्रम ठरवण्याची गरज असताना नुसत्या जाहिरातीच्या माध्यमातून कोरोना संपणार नाही, अशी टीका नवाब मलिक यांनी केली आहे.