Rekha Jare Case | ‘त्या’ डॉक्टरचा रेखा जरे हत्येशी काय संबंध? पोलिसांनी चौकशी केली पूर्ण

Rekha Jare Murder Case : बाळ बोठे याचा निकटवर्तीय असलेला डॉक्टर नीलेश शेळके याला शुक्रवारी पुण्यातून ताब्यात घेण्यात आले होते. आता अटकेची कारवाई पूर्ण करण्यात आली असून शेळकेची रवानगी पोलीस कोठडीत करण्यात आली आहे.

नगर : रेखा जरे खून प्रकरणातील आरोपी पत्रकार बाळ बोठे याचा शोध घेताना पोलिसांना शुक्रवारी दुसऱ्या एका गुन्ह्यातील आरोपी डॉ. नीलेश विश्वासराव शेळके सापडला होता.

पोलिसांनी जरे प्रकरणात डॉ. नीलेश शेळके याची चौकशी पूर्ण केली व त्याला आर्थिक गुन्हे शाखेच्या ताब्यात दिले. त्यानंतर आर्थिक गुन्हे शाखेने बँकेच्या फसवणूक प्रकरणी शेळके याला अटक केली आहे.

तसेच शेळके याला आज न्यायालयामध्ये हजर केले असता ३० डिसेंबरपर्यंत पोलीस कोठडीत ठेवण्याचे आदेश देण्यात आले आहेत.

नगरच्या कोतवाली पोलीस ठाण्यामध्ये २०१८ मध्ये डॉ. रोहिणी सिनारे यांनी फसवणुकीची फिर्याद दाखल केली होती. पाच कोटी ७५ लाख रुपयांची फसवणूक झाल्याचे त्यांनी म्हटले होते.

शेळके याने हॉस्पिटलला मशिनरी खरेदी करण्यासाठी बँकेकडून माझ्या नावाने कर्ज घेतले होते. मात्र मशिनरी खरेदी न करता माझ्या अकाउंट वरून त्यांनी परस्पर पैसे काढून अपहार केला व फसवणूक केली, असे त्या फिर्यादीत म्हटले होते.

हा गुन्हा नंतर स्थानिक आर्थिक गुन्हे अन्वेषण विभागाकडे वर्ग करण्यात आलेला होता. या गुन्ह्यामध्ये एकूण २५ आरोपी असून यामध्ये अहमदनगर शहर सहकारी बँकेच्या संचालक मंडळाचा सुद्धा समावेश आहे. ही घटना घडल्यानंतर या घटनेतील आरोपी डॉ. नीलेश शेळके याने अटकपूर्व जामीन मिळवला होता.

त्यानंतर पोलिसांनी त्याला उच्च न्यायालयात आव्हान दिले होते. तेथे शेळके याचा अटकपूर्व जामीन अर्ज फेटाळला. शेळके हा त्यानंतर सर्वोच्च न्यायालयात गेला, तेथेही त्याचा अर्ज फेटाळला गेला होता. त्या दिवसापासून शेळके हा फरार होता.

स्थानिक गुन्हे शाखेच्या पथकाने शुक्रवारी पुणे येथून डॉ. नीलेश शेळके याला ताब्यात घेतले. जरे प्रकरणात त्याची चौकशी करून त्याला आर्थिक गुन्हे शाखेकडे देण्यात आले.

आर्थिक गुन्हे शाखेने त्याला रात्री अटक केली. तर, आज आर्थिक गुन्हे शाखेच्या पोलीस निरीक्षक ज्योती गडकरी यांनी त्यांच्या पथकासह शेळके याला न्यायालयामध्ये हजर केले होते.

न्यायालयामध्ये सदरची घटना ही गंभीर स्वरूपाची आहे, यासंदर्भातील तीन वेगवेगळ्या घटना आहेत, फसवणुकीची तीन गुन्हे असून एकूण रक्कम ही १७ कोटी रुपयांच्या घरांमध्ये आहे. या घटनेतील शेळके हा मुख्य आरोपी असून त्याने हे पैसे कशा पद्धतीने काढले, हे पैसे कुठे वापरले गेले, यासह विविध प्रकारचा तपास पोलिसांना करायचा असल्यामुळे त्याला पोलीस कोठडी मिळावी, असा युक्तिवाद करण्यात आला. हा युक्तिवाद ग्राह्य धरत न्यायालयाने ३० डिसेंबर पर्यंत शेळके याला पोलीस कोठडीत ठेवण्याचे आदेश दिले आहेत.

दरम्यान, शेळके याला अटक केल्यानंतर अनेकांचे धाबे दणाणले आहेत. या फसवणुकीच्या प्रकारांमध्ये पंचवीस आरोपी असून यामध्ये सहकारी बँकेचे संचालक मंडळ यांचा सुद्धा आहे.

आर्थिक गुन्हे अन्वेषण विभागाने याअगोदर संचालक मंडळासह शेळके याची सुद्धा चौकशी केली होती. त्यावेळेला शेळके ने पूर्ण माहिती दिलेली नव्हती. सर्वोच्च न्यायालयाने जामीन अर्ज फेटाळल्या पासून गेल्या नऊ महिन्यांपासून शेळके फरार होता.