सावळा गोंधळ : कोरोनावर उपचार घेऊन घरी परतलेल्या युवकाच्या आईला मुलाचा कोरोनाने मृत्यू झाल्याचा फोन आला!

446

सातारा: कोरोना काळात आरोग्य यंत्रणेच्या गलथान कारभाराची अनेक प्रकरण समोर आली आहेत.

सातारा जिल्हयात फलटण येथील 20 वर्षीय युवकाला कोरोनामुळे जिवंतपणी मृत घोषित करण्याचा संतापजनक प्रकार घडला आहे.

आरोग्य यंत्रणेच्या भयंकर कारभाराची सातारा जिल्ह्यात चर्चा आहे. तर, जिल्हा शल्यचिकित्सक डॉ. सुभाष चव्हाण यांनी चौकशी करुन कारवाई करणार असल्याचे सांगितले आहे.

असा घडला भयंकर प्रकार

सातारा जिल्हयातील फलटण येथे एक धक्कादायक प्रकार उघडकीस आला आहे. कोरोनावर उपचार घेऊन पूर्णपणे बरा झालेल्या युवकाला त्याचा कोरोनाने मृत्यू झाल्याचा फोन आला.

या फोनमुळे कुटुंबातील लोक हादरून गेले. प्रशासनाकडून फोन आल्याने संबधित युवकाचे कुटुंबीय अवाक झाले.

ही संतापजनक घटना शहरातील मंगळवार पेठेत घडली आहे. सिद्धांत मिलिंद भोसले वय 20 असे या युवकाचे नाव आहे.

मे महिन्यात सिद्धांतला कोरोना

मे महिन्यात सिद्धांतची कोरोना चाचणी पॉझिटिव्ह आली होती. यानंतर युवकाने खासगी रुग्णालयात उपचारही घेतले होते. गेल्या महिन्याभरापासून तो ठणठणीत बरा झाला होता.

दोन दिवसापुर्वी 7 जुनला कोरोनाने मृत्यू झालेल्या यादीत संबधित युवकाचे नाव आले. त्यानंतर आरोग्य यंत्रणेकडून सिद्धांत भोसले याच्या आईला त्यांचा मुलगा मृत झाल्याचा फोन आला. या प्रकारामुळे आरोग्य विभागाचा भोंगळ कारभार पुन्हा एकदा चव्हाट्यावर आहे.

धक्कादायक बाब म्हणजे सिध्दांत भोसले या युवकाच्या आईला तुमचा मुलगा मयत झाला असल्याचा फोन प्रशासनाकडून आला आहे.

ही घटना लोकांना कळलावत फलटण येथील आरोग्य यंत्रणेबाबत संताप व्यक्त केला जात आहे. याबाबत संबधितांवर कडक कारवाई करावी, अशी मागणी जनसामान्यातून केली जात आहे.

चौकशी करुन कारवाई करणार

जिल्हा शल्यचिकित्सक डॉ. सुभाष चव्हाण यांच्याकडे या प्रकाराबद्दल विचारणा केली असता त्यांनी चौकशी करुन कारवाई करु, असे म्हटले.

आरोग्य यंत्रणेतील जे घटक याला जबाबदार असतील त्यांना पाठिशी घातले जाणार नाही, असे सुभाष चव्हाण यांनी सांगितले. त्यांच्यावर कारवाई करणार असल्याचेही ते म्हणाले.

LEAVE A REPLY

Please enter your comment!
Please enter your name here